Хрватски репрезентативец бил на три Мундијали, а не настапи на ниту еден

Во пресрет на Мундијалот, британски „Гардијан“ објави необичен податок поврзан со поранешниот хрватски репрезентативец Ентони Шериќ.

Шериќ, роден Австралиец и поранешен играч на Хајдук, а со Хрватска патуваше на три Мундијали без да одигра ниту една минута.

„Шериќ, солиден лев бек, беше дел од репрезентацијата во 1998, 2002 и 2006 година, но никогаш не настапи. Роберт Јарни беше на врвот на формата во Франција и на Далечниот Исток, а Марко Бабиќ беше стартер во сите три натпревари на првенството во Германија“, се вели во текстот на Гардијан. Во 1998 година Хрватска освои бронза, а во следните две првенства не ја мина групата.

Шериќ ја заврши кариерата во 2014 година во португалскиот Олханенсе. Претходно играше за Хајдук, Парма, Верона, Бреша, Лацио, ПАО, Бешикташ и Карабукспор, а од 1998 до 2006 година забележа 16 настапи за Хрватска.