Тен Хаг со последната изјава си го „потпиша“ отказот во Манчестер Јунајтед?

Ерик тен Хаг дефинитивно не го подобри Манчестер Јунајтед и тоа им е јасно на сите.

Од доаѓањето во клубот на Џим Ретклиф се погласно се зборува за негово заминување и изгледа дека би морал да направи чудо за да остане на клупата.

Како што пренесуваат медиумите во Велика Британија, Ерик Тен Хаг во последниот натпревар против Ковентри во ФА Купот прво разочарал со случувањата на теренот, а потоа и со изјавите по мечот. Јунајтед во тој натпревар против Ковентри имаше 3:0, но дозволи второлигашот да дојде до 3:3, за потоа да се „вади“ на пенали.

И покрај фактот што загубија огромно водство против тимот од Чемпионшип во еден од најважните натпревари во сезоната, Ерик тен Хаг по мечот изјави дека е задоволен и медиумите сега пренесуваат дека таа изјава ги налутила луѓето во клубот.

Победата против Ковентри на пенали откако имаа 3:0, па дозволија на противникот да дојде до 3:3 Тен Хаг ја истакна како „големо достигнување“…

„Добро игравме, 75 минути ја контролиравме играта, а потоа можеме само да го пофалиме Ковентри за тоа што го направи во последните 15 минути. Сепак, за мене победа во ваква ситуација е успех и да се покаже победнички менталитет откако противникот ќе се врати е големо достигнување“, изјави Тен Хаг по средбата.