Ристовски: Леао е „три метра“ и паѓа на секоја топка…

Репрезентативецот на Македонија, Стефан Ристовски беше еден од двајцата првотимци кај Динамо Загреб кој вчера беше поразен од Милан со 3:1.

Динамо го победи Челзи во првото коло, се надеваше на изненадување и против „росонерите“, сепак тоа не се случи. Ристовски на теренот беше до 78. минута кога на негово место влезе Јосип Дрмиќ. Адеми за кого ова беше 100. европски натпревар за Динамо го одигра целиот натпревар.

„Игравме против клуб кој е во топ 10 во светот и има голема традиција, затоа мора да бидеме со високо кренати глави. Ги казнија нашите грешки, ние мораме да продолжиме по истиот пат. Го победивме Челзи, изгубивме од Милан, распоредот е таков што немаме време ниту да тагуваме, ниту да одмараме“, изјави Ристовски.

Интересни изјави Ристовски даде на прашањето за двајцата фудбалери кои ги чуваше Рафаел Леао и стрелецот на третиот гол Томазо Побега.

„Леао е „толкав“ три метра, а паѓа на секоја топка. Имаше некој контакт, што знам. Сепак, сите знаат кој е Леао, а теренот е најдобар доказ и нема што посебно да се зборува. Побега? Ма сите ми побегнаа. Тешко е кога ќе ве притиснат и треба да се браните, мора да сте перфектни 90 минути, во овој натпревар Милан заслужено победи“, истакна Ристовски.