Леао: Ибра ми помогна најмногу, постојано внимава на мене

Рафаел Леао минатата сезона буквално „експлодира“ во дресот на Милан и беше прогласен за најдобар играч во Серија А.

Леао и оваа сезона продолжи со одличните партии, но призна дека првите две сезони му било многу тешко во Милан и дека Ибрахимовиќ одиграл важна улога во неговиот развој.

„Првите две години во Милан беа многу тешки. Дојдов од Франција, каде што лигата беше помала и животот беше многу поинаков. Кога ќе пристигнете во клуб како Милан, веднаш знаете дека мора да победувате, дека многу легенди го носеле овој дрес и освојувале многу трофеи. Тоа го чувствувате веднаш, и по транзицијата станав друг човек и друг играч“.

„Во овој период, најмногу ми помогна моето семејство, тренерот Пиоли и Ибра, кој постојано внимаваше на мене. Златан е вистински пример, ме научи колку е важно да останеш фокусиран, дури и надвор од теренот. Честопати разговараме, не како колеги или професионалци, туку како луѓе“, изјави Леао.