Малезија сериозно ја разгледува можноста Сепанг повторно да стане редовна станица во календарот на Формула 1, откако годинашната трка на патеката остави силен впечаток кај навивачите и возачите.
Настанот, кој беше организиран како замена за првично планираната трка во Бахреин, доби позитивни реакции, а во земјата веќе се размислува за нови Гран при викенди во иднина. Според извештаите, една од опциите е и модел со ротирачки термин, сличен на решенијата што веќе постојат за некои други патеки.
Ќе се пресметуваат трошоците пред конечна одлука
Организирањето на Ф1 викенд носи сериозни финансиски обврски, но во случајов најголемиот дел од трошоците го покрил Бахреин, бидејќи трката во 2026 година беше замена за неговиот првичен термин.
Според достапните бројки, годинашниот настан донел околу 233 милиони долари. Министерот за млади и спорт, д-р Мохамед Тауфик Џохаир, изјавил во парламентот дека веќе имало разговори меѓу ФОМ и малезискиот премиер Датук Сери Анвар Ибрахим.
Во писмениот одговор до парламентот било наведено дека тркачкиот викенд привлекол 261.000 посетители на патеката, од кои 103.000 биле присутни на самиот ден на трката.
„Организацијата на Формула 1 не е евтина. Станува збор за значителни трошоци и има неколку важни аспекти што мораме да ги процениме“, изјавил Тауфик за Ројтерс.
Дополнително, било посочено дека се продале повеќе од 97.000 билети, во земјата пристигнале над 50.000 туристи, а на настанот биле ангажирани и 5.000 работници.
Тауфик потсетил и на споредбата со 2017 година, кога продажбата на билети изнесувала околу 30.000, наспроти речиси 100.000 оваа година.
Пред да биде донесена конечната одлука, Малезија ќе ги анализира повратот на инвестицијата, вкупните трошоци и инфраструктурните услови. Според најавите, кабинетот треба да се изјасни по завршувањето на извештајот во ноември.
Учество во игри на среќа е дозволено за лица со 18+ години. Играј одговорно!