Даниеле Де Роси порача дека Џенова одиграла храбар и дисциплиниран меч против Рома, но на крајот била скршена од, како што самиот кажа, „ремек-дело“ на Сантијаго Кастро.
За Де Роси враќањето на „Олимпико“ секогаш носи посебна тежина, со оглед на тоа што е една од најголемите клупски легенди на Рома и во минатото седеше и на тренерската клупа на „волчицата“.
Сепак, овојпат беше на спротивната страна и долго време успеваше да ја држи својата екипа во игра. Рома на крајот славеше со 2-0, откако Кастро погоди со смел лоб-удар, а потоа мрежата ја затресе и Емануеле Лули.
Де Роси гледа напредок кај Џенова
„Свесни сме дека Рома има силен состав и го прифаќаме резултатот, но ако во секој меч против поквалитетен противник однапред се помириме со пораз, тоа би било сериозен проблем“, изјави Де Роси.
Тој потсети дека и минатата сезона Рома важела за посилен тим, но Џенова тогаш успеала да победи. Според него, натпреварот бил избалансиран околу 50 минути, сè до моментот кога Кастро го постигнал голот што целосно ја променил сликата на теренот.
„Ми се допадна духот на екипата. Тој гол малку нè исфрли од ритам, но и покрај тоа останавме во натпреварот до самиот крај“, додаде тренерот.
Џенова во првото полувреме имала и удар во рамката на голот преку Стефан Ел Шарави, кој исто така настапи на „Олимпико“ како противник, но гостите постепено го губеа интензитетот како што одминуваше средбата.
Де Роси смета дека првото полувреме било добро одработено, особено во затворањето на просторите и во индивидуалните дуели, но по паузата неговиот тим оставил повеќе време на Рома да игра со топката.
„Така се прави разликата. Во првиот дел добро ги затворавме просторите и тоа ни отвораше можности, но по одморот малку се развлечкавме и им дозволивме секунда повеќе на топка“, објасни тој.
Притисокот врз Де Роси и натаму постои, откако Џенова освои само еден бод во првите пет кола од Серија А, пред да дојде победата од 2-1 против Фиорентина.
Сепак, тренерот смета дека настапот против Рома е добар знак и продолжение на реакцијата што тимот ја покажа и против Фиорентина.
„Разговарав со директорите и чувствувам дека овој меч ни дава континуитет по победата над Фиорентина, не по резултат, туку по решителноста, пристапот и изведбата. За секој натпревар ќе имаме различен план, но вечерва сум задоволен од односот на момците“, истакна Де Роси.
Италијанскиот репрезентативец до 19 години Самуел Виафе го доби својот прв старт во Серија А, додека Томазо Балданци не настапи против клубот на кој му припаѓа.
Де Роси откри дека Балданци не бил класично повреден, но почувствувал затегнување на тренингот, а истото се повторило и на денот на натпреварот, па стручниот штаб решил да не ризикува.
„Имаме голема доверба во Балданци. Не беше точно повреден, но почувствува проблем и затоа не сакавме да ризикуваме. Се надеваме дека ќе биде подготвен за следната недела“, рече тренерот на Џенова.
За Виафе, пак, Де Роси имаше само пофални зборови.
„Во текот на летото се гледаше како младинец што треба да оди на позајмица, но навистина нè импресионираше. Физички е силен, има квалитет и знае што прави со топката. Не сакаме да ставаме преголем товар врз него, но навистина многу ми се допаѓа ова момче“, порача Де Роси.
Учество во игри на среќа е дозволено за лица со 18+ години. Играј одговорно!