Делије со порака пред мечот на Звезда: Помина речиси еден месец без „Север“

Црвена звезда денеска од 16 часот ќе игра против Младост од Лучани во рамки на 12. коло од Суперлигата на Србија.

Белградскиот тим влегува во овој натпревар во згуснат ритам, откако само 72 часа претходно го одигра европскиот меч во Лугано, а враќањето во Белград било подоцна од планираното. Токму поради тоа, тренерот Алберт Риера најави ротации во составот, особено ако се знае дека нов европски предизвик следува веќе во четврток.

Во пресрет на дуелот, Риера порача дека на тимот му е потребна силна поддршка од трибините, но и дека играчите мора да дадат причина навивачите да веруваат во нив.

„Потребна ни е искрена и убава поддршка. Сигурен сум дека ќе бидат со нас. Како и секогаш, мораме да им дадеме причина да веруваат во нас. Мислам дека последниот натпревар на сите ни донесе нешто важно, оптимизам и чувство дека некои работи ги правиме добро, но тоа не е доволно. Секако, сите сакаме нешто повеќе. На крајот, сакаме да бидеме целосно задоволни од начинот на кој играме, но и да победуваме. Првиот дел го остваривме. Вториот, за жал, не. Сепак, сигурен сум дека ова е најдобриот пат за да бидеме сè поблиску до победите“, изјави Риера пред натпреварот.

Пред овој меч се огласија и Делиите, кои со кратка порака ги повикаа навивачите да дојдат на трибината.

„Помина речиси еден месец откако не сме стапнале на Север! Сите вљубеници во Звезда и навивањето, се гледаме утре во 16 часот на нашето место!“, стои во нивната објава.

Така, натпреварот со Младост доаѓа во момент кога Звезда бара реакција по поразот во Лугано, но и дополнителен поттик од трибините пред новите обврски на домашната и европската сцена.