Заврши трката на 5 км на Скопскиот маратон – еве ги победниците во машка и женска конкуренција

Заврши трката на пет километри на скопскиот Виз ер маратон, пришто најдобри во машка конкуренција се Богдан Цветковски, Илија Миленковиќ и Горан Мојановски.

„Четврти пат учествувам на маратонот и еве оваа година сум прв. Сам тренирав, скоро секој ден, бев дисциплиниран и еве дојдоа резултатите“, рече Богдан Цветковски победник во трката на пет километри.

Во женска конкуренција најдобри беа Марго Бојаџиева, Рената Соколовска и Нагме Бурџук од Турција.

„Трчав и лани и тогаш бев втора. Задоволна сум од резултатот, 20 минути и 20 секунди. Желба ми е еден ден да победам на маратонот“, рече 14-годишната Марго Бојаџиев, победничка на трката од пет километри.

Полумаратон стазата од 21 километар и маратонот од 42 километри ја трчаат 8.500 учесници од 51 држава. Ќе има штафетно трчање на групи кои се пријавиле од разни компании. На маратонот трчаат и 168 вработени во компанијата Сивус.