Дербито Вардар – Шкендија ќе се игра без гостински навивачи

Утре со почеток во 15:30 часот во рамките од 1/8 финалето на македонскиот куп ќе се сретнат екипите на Вардар и Шкендија.

Од Вардар соопштија дека за овој натпревар ќе бидат отворени само западната и јужната трибина како и дека натпреварот ќе се игра без присуство на гостински навивачи.

„Фудбалскиот клуб Вардар ви соопштува неколку информации поврзани со утрешниот натпревар од 1/8 финалето од Купот на Македонија со Шкендија, кој ќе се игра на Националната Арена „Тодор Проески“. 

Натпреварот е прогласен за меч од висок ризик, и од тука нема да биде дозволено присуство на гостински симпатизери. 

За овој меч ќе бидат отворени само јужната и западната трибина, додека источната ќе биде затворена, а на северната ќе присуствуваат само службените лица. 

Билети ќе се купуваат на билетарницата на Националната Арена, и за секој купен билет, ќе мора да биде приложен документ за идентификација. 

ФК Вардар уште еднаш апелира на сите кои ќе дојдат на стадионот за фер и коректно навивање, без извици на национализам и расизам, и без фрлања на предмети на теренот. Дајте му поддршка на нашиот тим да стигне до добар резултат од ова дерби, и да ја продолжи победничката серија и во Купот“, стои во соопштението од ФК Вардар објавено пред овој натпревар.