Грчки фудбалски репрезентативец пронајден мртов во базен

Фудбалерот на Панатинаикос и на грчката репрезентација Џорџ Балдок (31) вечерва бил пронајден мртов во базенот во својот дом во Атина, јавуваат грчките медиуми.

Балдок е пронајден под вода и немало начин да се спаси, пишуваат грчките медиуми, а деталите за трагедијата се уште не се познати.

Се шпекулира дека покрај безживотното тело било пронајдено шише вотка. Го барала неговата сопруга која не можела да го најде, по што му се јавила на заеднички пријател кој отишол во куќата во Глифада каде наишол на страшна сцена.

Десниот бек изминатово лето направи трансфер во Панатинаикос и оттогаш живеел во Атина, се до изминатава вечер кога неговото тело било пронајдено во базенот.

Пред трансферот во Панатинаикос, Балдок ги претставуваше Милтон Кејнс Донс и Шефилд Јунајтед во Англија, успеа да се натпреварува и во Премиер лигата, а последниот настап за Грција го имаше оваа година во месец март против Грузија.