Гласање за „Ол-Стар“: Лука има повеќе гласови од една од најголемите ѕвезди во НБА!

НБА лигата ги објави новите резултати од гласањето на фановите за „Ол-Стар“ натпреварот, а она што се забележува во прв момент е неверојатно високиот пласман на Лука Дончиќ.

Доказ дека 19 годишниот Словенец навистина блеска во најсилната кошаркатска лига е тоа дека има повеќе гласови од една од најголемите ѕвезди во НБА, Стеф Кари.

Лука Дончиќ на овој пресек собра 2.220.077 гласови, а на Западот единствено повеќе има само Леброн Џејмс – 2.779.812.

Овогодинешниот „Ол Стар“ се игра на 17-ти февруари во Шарлот, а гласовите од публиката се само 50% од изборот. Преостанатиот процент се бира од страна на играчите и претставниците на медиумите.

Остатокот од ростерот традиционално го пополнуваат тренерите, но вреди да се потсети дека од минатата година нема натпревар помеѓу Западот и Истокот, иако и од двете конференции доаѓаат ист број играчи.