Гатузо после киксот во Парма: Можеби не сум доволно добар тренер!

Милан на гостувањето во Парма одогра 1:1 и загуби два драгоцени бода во битката за пласман во Лигата на шампиони.

„Росонерите“ поведија со голот на Кастиљехо во 59-та минута, но во 87-та минута Бруно Алвеш постигна прекрасен гол од слободен удар за конечни 1:1.

„Првото полувреме беше премногу бавно. Парма се затвори, а ние немавме идеја. Имавме среќа и постигнавме гол, но Парма заслужи бод. Малку бевме наивни и не смеевме да ја испуштиме предноста. Можеби јас не сум доволно добар тренер, но се обидувам да им објаснам на играчите колку се важни деталите и малите работи во фудбалот“, изјави Гатузо.

„Јас сум објективен и сакам да ги кажам работите онакви какви што се. Очекував да покажеме повеќе на овој натпревар, иако знаевме дека Парма е незгоден противник. Немавме среќа кај голот на Кутроне, беше офсајд, но одлучуваа милиметри. Сепак, ова не е трагедија, се уште сме во игра за место кое води во Лигата на шампиони“, заклучи Гатузо.

Милан во среда игра против Лацио во реванш полуфиналето во Купот на Италија, а потоа му гостува на Торино следниот викенд во Серија А.