Во Израел освоивме бод, но ќе жалиме за шансата на Елмас (ВИДЕО)

Вечерва нашата сениорска репрезентација го одигра натпреварот во петтото коло од квалификациите за Европското првенство, наш противник беше селекцијата на Израел.

Израел пред натпреварот ја имаше улогата на благ фаворит, меѓутоа на теренот нашата селекција во поголем дел од натпреварот беше рамноправен противник.

Домаќините подобро го отворија натпреварот и создаваа прилики пред голот на Димитриевски. Во првото полувреме тие и ја погодија нашата мрежа после една грешка на Димитриевски, меѓутоа за наша среќа тој гол беше поништен поради играње со рака.

Израел до водство стигна после десетина минути игра во второто полувреме и тоа преку нивниот најдобар играч Захави кој остана сам во нашиот петерец.

Изедначувањето стигна само девет минути подоцна. Алиоски одлично нафрли после еден прекршок, додека на вистинското место во шеснаесетникот се најде Аријан Адеми.

До крајот Израел имаше теренска иницијатива, но ние ја имавме најголемата шанса и тоа во судиското продолжение кога Елмас место да шутира се одлучи да додава.

Со ова реми стигнуваме до пет освоени бодови, Изараел е второпласиран со осум.