Челзи спрема „револуција“ – овие четворица сигурно заминуваат

Челзи на лето спрема големи промени во тимот, ќе пристигнат многу нови фудбалери, но и неколку ѕвезди сигурно ќе го напуштат „Стенфорд Бриџ“.

„Сините“ веќе започнаа со летните трансфери и веќе го договорија трансферот на Хаким Зијах од Ајакс за 45 милиони евра.

Како главни мети во летниот преоден рок за „сините“ ќе бидат Чилвел од Лестер, Дембеле од Лион, а веројатно одбраната ќе биде засилена со Аке од Борнмут.

Медиумите најавуваат дека ќе има „чистка“ и неколку фудбалери сигурно ќе заминат ова лето. Педро и Жиру не се во плановите и нема да им бидат продолжени договорите, па ќе заминат како слободни агенти.

Иста е и ситуацијата со Бачуаи, а преговорите со Вилијан за нов договор се во застој, па најверојатно и Бразилецот ќе го напушти „Стенфорд Бриџ“.

Лампард исто така инсистира да му биде донесен и нов голман, бидејќи повеќе не му верува на Кепа.