Нејмар им стави крај на сите дилеми: Среќен сум во Барселона

Напаѓачот на Барселона, Нејмар ги демантираше информациите во медиумите од својата земја дека речиси е прифатена понудата од ПСЖ и дека ова лето ќе се пресели на „Паркот на принцовите“.

Францускиот клуб за Нејмар е подготвен да издвои неверојатни 222 милиони евра и само од 25-годишниот напаѓач зависи дали ќе го прифати предизвикот и по четири сезони минати на „Камп Ноу“ ќе ја промени средината.

„Изминатата сезона беше моја најдобра во Барселона. Се навикнав на градот и клубот и среќен сум. Се тоа влијае на играта на еден спортист. Изминатата сезона конечно се чувствував потполно комфортно, иако не ја освоивме титулата. Одиграв некои фантастични натпревари и со екипата доживеав неверојатни моменти. Во сезоната 2017/18 мораме уште да работиме и да бидеме подобри“, истакна Бразилецот.

Нејмар има договор со Барселона до летото 2021. година, а во Каталонија пристигна од Сантош.