УС Опен: Болно простување на Ферер против Рафа, Вавринка шампионски против Димитров

Првиот ден УС опен донесе интересни, но и еден емотивен дуел.

Рано утрото беше завршен првиот ден од последниот грен слем во сезоната, УС Опен на кој беа одигра 32 натпревари во машки сингл.

Најмногу внимание секако привлече шпанското дерби (кое од поодамна не е тоа), помеѓу Рафаел Надал и преискусниот Давид Ферер. Овој меч Ферер го предаде поради повреда на Ахиловата тетива при резултат 6:3, 3:4 за Рафа. За Ферер ова воедно беше и последен грен слем во кариерата која ќе ја заврши оваа сезона.

Беше навистина емотивно бидејќи од тенисот полека се простува еден од најголемите борци кои некогаш се појавиле. Болките во уништените Ахилови тетиви на двете ноги го примораа 36 годишниот тенисер да се подготви за крај.

„Ќе се одморам и ќе се опоравам со семејството во наредните месеци, а потоа и дефинитивно ќе се простам од тенисот најверојатно на турнирот во мојата родна Валенсија кон крајот на октомври“, изјави поранешниот трет најдобар играч во светот.

Oна што беше најавувано како меч на денот се претвори во уште една бламажа на Григор Димитров кој лесно со 6:3, 6:2 и 7:5 беше испратен дома од шампионот на УС Опен Стен Вавринка ко очигледно успеа да ја врати шампионската форма после двојната операција коленото.