Пиоли: Се надевам дека ова не е последниот танц на Ибра

Милан е многу блиску до освојувањето на титулата, а тренерот Стефано Пиоли предупреди дека „росонерите“ мораат да останат фокусирани на двете средби кои следуваат, првата е денес против Аталанта на домашен терен.

Аталанта знае да биде незгоден противник, но Пиоли очекува Милан повторно да прикаже добро издание и да ја продолжи серијата на одлични резултати.

„Секој натпревар за нас е финале, така е веќе некое време. Верувам така ќе биде и против Аталанта кој е незгоден ривал, но ние сме спремни. Не постои тензија во нашата соблекувална како што се зголемува притисокот сите уживаме во она што го правиме, играчите се максимално дисциплинирани“, изјави Пиоли.

Зборуваше Пиоли и за најавите дека ова ќе биде последниот натпревар на Златан Ибрахимовиќ во дресот на Милан.

„Последниот танц на Ибра? Се надевам нема да биде така. Тој е шампион со големо Ш. Не зборуваме тука само за фудбалските квалитети, туку за лидерството и самодовербата која ја носи со себе. Ибрахимовиќ е човек кој не можете да го опишете со зборови. Искрено се надевам дека ќе продолжи да игра и следната сезона“, истакна стратегот на „росонерите“.