Милан најде напаѓач во Серија А: Има шест гола од осум шута

Примарна цел на Милан во зимскиот преоден рок е доведување на централен напаѓач, потвдија италијанските медиуми.

Повредата на Златан Ибрахимовиќ се покажа потешка од предвиденото, па најверојатно ќе паузира уште еден месец. Поради тоа „росонерите“ сигурно ќе донесат негова замена во јануари.

Медиумите шпекулираат со неколку имиња, приоритет е Лука Јовиќ од Реал Мадрид, а најново име на списокот е напаѓачот на Специја, Мбала Нзола.

Овој 22 годишен напаѓач го привлече вниманието на многу клубови оваа сезона. Веќе има постигнато 6 гола во Серија А сезонава и тоа од само 8 шута на голот.

Французинот ова лето пристигна во Специја и неговата цена во моментов изнесува 5 милиони евра, сума која Милан нема да има проблем да ја плати.