Дончиќ го одведе Далас до меч топка, Бостон со „метла“ за Бруклин!

Далас Маверикс поведоа со 3:2 против Јута во првата рунда од плеј-офот на Западната конференција во НБА лигата.

Мавси во петтиот натпревар ја декласираа Јута со 102:77 во натпревар во кој од почетокот до крајот беа подобриот ривал на теренот. Словенецот Лука Дончиќ се врати после кратката пауза и одигра одличен натпревар. Дончиќ натпреварот го заврши со учинок од 33 поени, 13 скокови и пет асистенции.

Во победничката екипа треба да се издвои и Брунсонс кој постигна 24 поени, запиша пет скоак и подели четири асистенции. Прво име во редовите на Јута беше Кларксон со 20 поени, четири скока и три асистенции. Го следеше Гобер со дабл-дабл од 17 поени и 11 скокови. Шестиот натпревар во оваа серија е закажан за на 28. Април.

Торонто успеа да слави на гости против Филаделфија со 88:103 и да остане во живот (3:2). Сиакам со дабл-дабл од 23 поени 10 скокови и 7 асистенции ги предводеше Рапторси. Ембид во редовите на Филаделфија имаше сличен учинок од 20 поени, 11 скокови и четири асистенции.

Бостон Селтикси ја завршија работата и со победата од 112:116 на гости го елиминираа Бруклин (4:0). За Бруклин во овој натпревар не беше доволен и одличниот настап на Кевин Дурант кој постигна 39 поени. Кај Бостон најрасположен беше Татум со 29 поени.