Дерби на денот: Холандија сака да ги сруши соништата на Меси

Денес почнуваат четвртфиналните пресметки на Мундијалот во Катар, а најголемо внимание секако привлекува дуелот помеѓу Холандија и Аргентина.

Ова е можеби најнеизвесниот четвртфинален дуел според квалитетот на репрезентациите и сето она што го покажаа во досегашниот дел од Мундијалот. Двете репрезентации имаат за цел пласман во полуфиналето, па ова ќе биде серизона препрека, а место таму има само за еден.

Холандија сака да ги уништи соништата на Меси

Холандија имаше релативно лесно работа во групната фаза каде беше изразит фаворит и очекувано го освои првото место во групата. Во осминафиналето ја надиграа селекцијата на САД, што беше и очекувано, па впечатокот е дека „лалињата“ полека ја темпираат формата. Меѓутоа, ова ќе биде најтежок испит до сега за Холандија, особено за одбраната, која до сега прими само два гола. Меѓутоа, дефанзивната линија и покрај малиот број на примени голови покажа голема несигурност па селекции како Катар и САД лесно им создаваа шанси. Интересно е што Холандија има само еден пораз во оваа фаза на Светските првенства, па „лалињата“ го сонуваат успехот од 2010 и 2014 година кога беа второ и трето место. Добра вест е што Ван Гал на располагање ги има сите репрезентативци и не се очекуваат големи промени од тимот со кој играше во групната фаза.

„Гаучосите“ ја сонуваат „Божицата“

Ова е секако последен обид за Лионел Меси да ја однесе Аргентина од титулата светски шампион и да добие статус на „бесмртен“ како неговиот идол Марадона. Лео е еден од најголемите фудбалери во историјата, но секако оваа титула е највредна и може да ја комплетира неговата кариера. Аргентина иако на катастрофален начин го отвори Мундијалот со пораз од Саудиска Арабија, сепак успеа да ја накрене формата и потоа покажа зошто е еден од фаворитите, па го освои првото место во групата. Тоа им донесе релативно лесен противник во осминафиналето, па „гаучосите“ немаа големи проблеми против Австралија. Иако победија со 2:1 се чини дека можеа многу полесно да дојдат до победата и само ја темпираа формата за оваа фаза од шампионатот. Ова е секако најсериозен испит за Меси и дружината, но ако целта е „Божицата“, тогаш Холандија не би требало да претставува голем проблем. Голем хендикеп за „гаучосите“ во овој дуел може да претставува евентуалнотоо отсуство на Де Паул. Фудбалерот на Атлетико е под знак прашалник, а до сега беше еден од најдобрите во селекцијата.

Очекување

Дуел на две репрезентации кои играат отворен фудбал, па очекуваме многу возбудувања и голови. Впечатокот е дека дефанзивата сепак ќе го одлучи победникот и таа репрезентација која ќе одигра поорганизирано во одбрана ќе оди во четвртфинале.