Во Реал се радувале на поразот на Јувентус од Атлетико поради две причини

Фудбалерите на Јувентус во средата беа поразени на гостувањето во Мадрид против Атлетико со 2:0 во првиот натпревар од осминафиналето во Лигата на шампионите.

„Старата дама“ важи за еден од најголемите фаворити во Лигата на шампионите, но ги разочараа своите навивачи со лошата игра и поразот од Атлетико. Негативни коментари имаше и за Роналдо кој имаше и конфликт со навивачите на Атлетико.

Роналдо беше дочекан со силни свирежи и дофрлувања од трибините, но ниту тој не остана должен и им одговори покажувајќи пет прста (алудирајќи на тоа колку титули има во Лигата на шампионите). Јасно, нетрпеливоста произлезе од тоа што Роналдо со години играше за големиот градски ривал на Атлетико, Реал Мадрид.

Денес шпанските медиуми пренесуваат дека фудбалерите на Реал Мадрид заедно го следеле овој натпревар во кој навивали за градскиот ривал и се радувале на поразот на Јувентус. Во таборот на „кралевите“ посакуваат Јувентус да испадне уште во првата рунда од нокаут фазата.

Причината според „АС“ не е само Роналдо, туку и лошата традиција која ја имаат „кралевите“ против „старата дама“ кога станува збор за натпревар од нокаут фазата (со исклучок на финалињата).

Сепак останува да се одигра реваншот и дефинитивно доколку овие информации кои доаѓаат пред се од мадритските медиуми ако се точни ќе го натераат Роналдо да им одговори, секако ако Јувентус го сврти резултатот во своја корист.