Ваква борба за титула во Формула 1 не се случила веќе 15 години

Пред последната трка од Светскиот шампионат во Формула 1, Големата награда на Абу Даби, која ќе се вози во недела на патеката Јас Марина, три возачи имаат можности да ја освојат титулата – Британецот Ландо Норис (McLaren), Холанѓанецот Макс Верстапен (Red Bull) и Австралиецот Оскар Пиастри (McLaren).

Норис води со 408 поени, а ќе ја обезбеди првата титула во кариерата ако заврши на едно од првите три места, без разлика на резултатите на противниците. Актуелниот светски шампион Верстапен е втор со 396 поени, додека Пиастри на третото место има 392 поени. Да потсетиме, победата носи 25 поени, второто место 18, третото 15, а четвртото 12 поени.

“Ова беше неверојатна сезона. Имаме неверојатен автомобил. Горд сум на сите во тимот. Благодарност до сите наши навивачи. Имаме уште една трка и ќе дадеме сè од себе”, порача 26-годишниот Норис.

Верстапен, кој може да се придружи на легендарниот Германец Михаел Шумахер како единствениот возач со пет последователни титули, на крајот од август заостануваше дури 104 поени зад Пиастри. “Остануваме во борбата до крај”, изјави Холанѓанецот по победата во Катар минатиот викенд.

Холанѓанецот, победата нема да биде доволна; во тој случај Норис мора да заврши четврти или послабо пласиран. Во слична ситуација е и Пиастри, кому ако победи, тимскиот колега Норис мора да заврши шести или подолу. Од McLaren најавија дека пред одлучувачкиот викенд ќе разговараат со своите возачи.

Последен пат три возачи ја ловеа титулата на последната трка од сезоната во 2010 година, а на крајот се радуваше Германецот Себастијан Фетел во Red Bull, иако во последната трка влезе од третото место и 15 поени зад водечкиот Фернандо Алонсо во Ferrari, додека меѓу нив беше Австралиецот Марк Вебер со осум поени помалку.

На крајот Фетел победи во Абу Даби, освојувајќи ја титулата со 256 поени. Алонсо беше само седми и сезоната ја заврши како втор со 252 поени, додека Вебер ја заврши трката како осми, а вкупно трет со 242 поени.