УЕФА воведува новитет во Лигата на шампионите

Кровната куќа на европскиот фудбал соопшти дека од сезоната 2027/28. Лигата на шампионите ќе добие уште еден атрактивен елемент во својот календар.

Имено, новата сезона на најелитното натпреварување веќе нема да започнува со стандардниот распоред на натпревари од првото коло.

Наместо тоа, бранителот на титулата ќе има чест на својот стадион да го одигра воведниот натпревар на Лигата на шампионите.

Тој натпревар ќе биде закажан во посебен, ексклузивен термин – во вторник навечер.

Сите останати натпревари од првото коло потоа би се играле ден подоцна, во среда и четврток.

Со овој потег, УЕФА сака да создаде дополнителен медиумски спектакл кој симболично ќе го означи почетокот на новата европска фудбалска сезона.

Планот е воведниот меч на бранителот на титулата да стане своевидна традиција и централна манифестација на почетокот на Лигата на шампионите.

Одлуката е мотивирана и од финансиски причини, бидејќи УЕФА на овој начин сака дополнително да ја зголеми вредноста на телевизиските права.

Ексклузивниот натпревар во посебен термин би можел да донесе милионски износи во нови договори со ТВ куќи.

Како што се наведува, токму новиот циклус на продажба на телевизиски права ќе започне со сезоната 2027/28., што ќе овозможи поголем приход.

УЕФА се надева дека со ова и со други иновации ќе постигне годишен приход од дури пет милијарди евра.

Тоа би претставувало зголемување од околу 600 милиони евра во однос на сегашниот приход од Лигата на шампионите.

Новата идеја се вклопува во пошироката стратегија на УЕФА да ја зголеми глобалната видливост и комерцијалниот потенцијал на елитното натпреварување.