Салах имал еден услов за Ливерпул

Големата ѕвезда на Ливерпул, Мохамед Салах, бара зголемување на сегашната плата од 350,000 фунти неделно за да потпише нов договор со “мерсисајдците”. Ова го тврди новинарот Екрем Конур, како и неколку сајтови на Островот.

Според информациите во последните денови, преговорите помеѓу агентот на играчот Рами Абас Иса и клубот се многу интензивни и од кампот на Салах изјавиле дека желбата на Египќанецот е да остане ако сегашната плата му биде зголемена, и покрај тоа што и натаму има интерес од Пари Сен Жермен и клубови од Саудиска Арабија.

Ливерпул сѐ уште продолжува да преговара и со тројцата главни играчи со договори кои истекуваат – Салах, Ван Дајк и Александер-Арнолд, но засега клубот не објавил дека постигнал договор со ниту еден од нив.

Доскоро се сметаше дека еден од главните проблеми е рокот на договорите на првите двајца играчи, кои имаат по 32 и 33 години, соодветно. За десниот бек пак се тврди дека тој веќе решил да се пресели во Реал Мадрид.

Салах игра извонредна сезона и веќе има 23 гола и 14 асистенции само во Премиер лигата, и според многумина тој се наметнува како главниот фаворит за “Златната топка” оваа година. Египќанецот и во моментот е најплатениот играч на Ливерпул.