Познат е терминот за четвртфиналето на Ѓоковиќ, но дали воопшто ќе се одигра?

Новак Ѓоковиќ со сигурна победа против Лоренцо Музети се пласираше во четвртфиналето на мастерсот во Мајами и вечерта помеѓу четврток и петок ќе се бори за место меѓу четворицата најдобри на Флорида.

Организаторите одлучија дека Ноле и Себастијан Корда ќе излезат на Централниот терен не пред 1:30 по полноќ, односно по завршувањето на дуелот меѓу Ема Радукану и Џесика Пегула, но се поставува прашањето колку е ривалот на легендарниот српски тенисер подготвен да се спротивстави на теренот.

Американецот во осминафиналето во три сета беше подобар од Гаел Монфис, но на крајот од мечот побара медицински тајм-аут поради болка во зглобот. На Корда му помогна дождот во вторникот бидејќи веднаш по повредата дуелот беше прекинат и продолжен по повеќе од два часа, па имаше време таблетите барем малку да делуваат.

Победникот на мечот Ѓоковиќ – Корда во полуфиналето ќе се сретне со Франсиско Серундоло или Григор Димитров.