Поранешните претседатели на УЕФА и ФИФА на ново судење

Поранешниот претседател на Меѓународната фудбалска федерација (ФИФА) Сеп Блатер пристигна на швајцарскиот суд на ново судење по обвиненија за измама, фалсификување и проневера.”

Имам надеж”, рече Блатер на германски, додека полека одеше надолу по скалите кон зградата на судот.

Тој пристигна 10 минути по поранешниот претседател на Европската фудбалска унија (UEFA) Мишел Платини, кој исто така е обвинет во истиот случај.

Блатер и Платини ги чека второ судење скоро три години откако тројца федерални судии ги ослободија од обвиненијата. Обвиненијата се однесуваат на исплатата на Блатер од два милиони швајцарски франци на Платини.

Кога федералното обвинителство го објави првото обвинение во ноември 2021 година, беше наведено дека таа исплата “ги оштетила средствата на ФИФА и незаконски го збогатила Платини”.

Ослободувачката пресуда следеше скоро седум години по откритието на истрагата, а Блатер и Платини беа отстранети од лидерските позиции во ФИФА и УЕФА. Тогаш беше завршена кампањата на Платини за наследник на Блатер на чело на светската куќа на фудбалот.

Се очекува ова судење да трае до четврток, а изрекувањето на пресудата на тричлениот судски совет е закажано за 25 март.

Блатер и Платини постојано ги отфрлаат неправилностите. Тие тврдат дека постигнале усмен договор за исплата на Платини за необезбедена работа на советување во мандатот на Блатер од 1998 до 2002 година.

Федералните обвинители бараат казни од 20 месеци, условно за две години.

Блатер и Платини се пред суд повеќе од 14 години по исплатата и девет и пол години откако швајцарските федерални обвинители формално започнаа истрага.

Деталите за исплатата се појавија по корупцискиот скандал кој ја погоди ФИФА во мај 2015 година. Американските федерални истражители почнаа обемна истрага за меѓународните фудбалски функционери. Швајцарските власти во раните утрински часови во хотел во Цирих спроведоа апсења и потоа запленија финансиска и деловна документација на ФИФА.

Блатер и Платини беа ослободени во јули 2022 година, после 11 дена судење пред швајцарскиот федерален кривичен суд во Белинцона.

Канцеларијата на швајцарскиот државен обвинител и ФИФА поднесоа жалба неколку месеци подоцна, а новото судење беше одложено откако Платини минатата година доби пресуда со која беше наредено изземување на федералните апелациони судии.

Второто судење започна денеска во зградата на окружниот суд кој заседава како федерален трибунал, а FIFA не е застапена на судот.

“Каде е FIFA?”, праша адвокатот на Платини, Доминик Нелен и побара од судот да ја отфрли жалбата на светската куќа за фудбал и граѓанската тужба.

ФИФА покрена граѓанска тужба за враќање на парите и 229.000 швајцарски франци платени за давачки и камата. Платини рече дека парите ги пријавил како приход и дека платил данок.

Од кога ги суспендираше Етичкиот комитет на ФИФА во октомври 2015 година, ниту Блатер ниту Платини не работат во фудбалот.

Платини ја издржа суспензијата во 2019 година, а FIFA во 2021 година му издаде нова забрана на Блатер, неколку месеци пред истекот на првата суспензија.

Поранешниот претседател на FIFA е суспендиран од фудбалот до крајот на 2028 година, кога ќе има 92 години, поради етички причини, откако лично си доделил бонуси во осумцифрен износ за успешно организирање на Светското првенство во 2010 година во Јужноафриканската Република и четири години подоцна во Бразил.