Омерагиќ: ФФМ во претходните две години имала повеќе расходи толку приходи

Фудбалската федерација на Македонија (ФФМ) денеска го оддржува своето Редовно Изборно Генерално Собрание. 

На Собранието присутни се 65 од вкупно 66 делегати од Општинските фудбалски Сојузи и клубовите во рамки на системот на натпревари на нашата федерација. 

Актуелниот претседателот Масар Омерагиќ на Изборното Собрание е единствен кандидат за четиригодишен мандат на чело на ФФМ. 

Во својот говор на почетокот од работниот дел, првиот човек на македонскиот фудбал се осврна на состојбата која ја затекна од неговото доаѓање на чело на федерацијата на 22. декември 2024 година. 

Масар Омерагиќ – претседател на ФФМ:

„Денес, по речиси три месеци од преземањето на функцијата претседател на Фудбалската федерација на Македонија, пред вас стојам со обврска да ви се обратам отворено, искрено и одговорно.

Свесен бев дека ме очекуваат големи предизвици, но затекнатата состојба во федерацијата беше покомплицирана од очекуваното.

Важно е да зборуваме транспарентно за финансиската состојба, бидејќи секоја стабилна и успешна организација мора да се потпира на одговорно управување со средствата.

Факт е дека во изминатите две години федерацијата имала повеќе расходи отколку приходи. Ова е сериозен предизвик што укажува на потреба од подобро планирање, поголема контрола и појасна финансиска стратегија. Само во реалното работење, федерацијата е во минус од еден милион евра.

Фудбалската академија, која треба да биде срцето на развојот на нашиот спорт, се соочуваше со сериозни предизвици – недоволни услови за работа, непродуктивни трошоци и пробиен буџет. Без јасна стратегија и без вистинска поддршка за младите таленти.

Младинските категории, кои се основата на секоја репрезентација, немаа доволна поддршка и јасен долгорочен план за развој. Потребно е подобро организирање, како и повеќе ресурси за нивен напредок.

Дополнителен проблем беше и состојбата на административната зграда, која треба да ја симболизира сериозноста и професионалноста на федерацијата. Се соочивме со предизвици и во односите меѓу вработените, што дополнително влијаеше на ефикасноста на работењето.

Од особена важност е прашањето за инвестициските фондови за инфраструктура. Средствата предвидени за овие проекти се потрошени до 2028 година, но резултатите не се на очекуваното ниво. Голем дел од инвестициите беа насочени кон проекти што сèуште не се целосно функционални, а стадионите и терените, кои требаше да бидат подобрени, сè уште не нудат соодветни услови за клубовите и фудбалерите.

Сепак, во овој период имавме и светла точка – нашата А репрезентација, која ни донесе гордост и докажа дека со тимска работа и верба во сопствените квалитети можеме да постигнеме големи резултати. Нивниот успех треба да биде поттик за подобрување на целиот фудбалски систем, од најмладите категории до највисокото ниво.

Но, наместо да се навраќаме на минатото, наша должност е да гледаме напред и да работиме на подобрување на состојбата. Веќе преземаме конкретни чекори:

• Финансиска ревизија на сите досегашни проекти, со цел да обезбедиме поголема транспарентност.

• Нова стратегија за инвестиции во инфраструктура, насочена кон реалните потреби на клубовите, а тоа се терени за тренинг и терени за натпревари, особено во Првата и Втората лига.

• Строг надзор над трошењето на средствата, за да се осигураме дека инвестициите одат во вистински проекти што ќе донесат долгорочни резултати.

Време е да поставиме нови стандарди во нашето работење. Нашата цел е да изградиме федерација што ќе биде стабилна, транспарентна и посветена на напредокот на македонскиот фудбал. Ова не е лесен процес, но е неопходен.

Пред нас е многу работа, но ве уверувам – федерацијата повеќе нема да биде симбол на неорганизираност, туку институција што ќе работи професионално и во интерес на македонскиот фудбал.Македонскиот фудбал го заслужува тоа“!