Нејмар е блиску до нов договор

Нејмар е во напреднати преговори со Сантос за нов договор. Тековниот договор на бразилската ѕвезда истекува на крајот на месецов.

Според „ESPN“, раководството на клубот веќе постигнало договор со таткото и агентот на фудбалерот, Нејмар-старши, и фудбалерот ќе потпише нов договор според кој ќе остане уште шест месеци, односно до Светското првенство во Соединетите Американски Држави, Мексико и Канада.

33-годишниот Нејмар моментално е на одмор во САД. И покрај тоа што имаше проблеми со повреда на левото колено, тој помогна на Сантос да го задржи местото во бразилската елита, откако постигна четири гола во последните три шампионатски натпревари.

Се очекува поранешниот играч на Барселона и Пари Сен Жермен да се подложи на артроскопија на коленото пред крајот на годината. Процедурата е минимално инвазивна хируршка операција и очекуваното време за закрепнување е околу еден месец. Нејмар се надева дека летово ќе учествува по четврти пат на светско првенство.