Најбараниот напаѓач на Европа го избра Арсенал и „најтешкиот“ број во Лондон

Веќе долго време навивачите на Арсенал се во голема неизвесност околу потписот на напаѓачката машина на Спортинг, Виктор Ѓекереш, но се чини дека од денес можат да се опуштат.

Речиси секогаш добро информираниот новинар на Атлетик, Дејвид Орнштајн, објави дека Арсенал ги заврши сите работи околу доаѓањето на 27-годишниот напаѓач од Шведска, и дека медицинските прегледи се очекуваат веќе утре.

Формулата гласи вака – „топџиите“ ќе му исплатат на Спортинг 63.500.000 евра веднаш, плус уште 10.000.000 евра во вид на бонуси, додека самиот фудбалер ќе го земе легендарниот број 14 кој долго време го носеше Тиери Анри, најдобриот стрелец во историјата на клубот.

Ѓекереш можеше ова лето да избере каде ќе продолжи, во еден момент во трката се вмеша и Манчестер јунајтед надевајќи се дека ќе надвладее соработката со Рубен Аморим, но Швеѓанецот со унгарско потекло од самиот почеток сакаше само во Арсенал, со кој ќе потпише петгодишен договор.

Долго време Микел Артета се мачеше да најде класичен напаѓач, особено по повредата на Габриел Жезус, „деветката“ ја играше и Кај Хаверц, но јасно е дека на талентираниот тим му беше потребен „убиец“ пред голот.

Во Арсенал веруваат дека тоа е токму Виктор Ѓекереш, кој, покрај тежината на скапоценото засилување, носи можеби и уште поголема – број 14, кој не го избра случајно, откако Жезус не сакаше да ја препушти својата „деветка“.

Бројот 14, по Анри, го носеа Тео Волкот и Пјер-Емерик Обамејанг со променлив успех, иако треба да се истакне дека тоа не беа најтрофејните години на клубот од северниот дел на Лондон.

Фото: Принтскрин