На „Енфилд“ му е „забранет влез“ поради Жота, а тој првпат се изјасни: „Сето ова е толку сурово“

Луис Дијаз во дебито за Баерн успеа да се запише на листата стрелци, а голот го прослави во стилот на Диого Жота. Колумбиецот поради Жота беше на жестока мета на критики и сега за првпат одлучи да зборува на таа тема.

Дијаз беше жестоко критикуван од навивачите на Ливерпул и многумина сметаат дека тоа беше и главната причина што на крајот клубот толку лесно одлучи да го пушти да оди во Баерн.

Меѓутоа, откако својот дебитантски погодок во дресот на Баерн го посвети на Жота, тој и за првпат зборуваше за трагичната смрт на португалскиот репрезентативец што пред скоро два месеци ја потресе јавноста.

Дијаз истакна дека сѐ уште е во шок од она што му се случи на Жота и на неговиот брат и никако не може да прифати дека тие повеќе не се меѓу нас.

„Сето ова е толку сурово… Фактот дека повеќе не е со нас и дека изгубивме неверојатен соиграч е нешто во кое сѐ уште не можам да верувам. Никој од нас не беше подготвен да добие такви вести. Тој беше навистина одличен соиграч кон мене“, рече Дијаз.