Мурињо остави долг во хотел во Турција од 750.000 евра

Турските медиуми открија уште неколку детали за престојот на контроверзниот тренер во Фенербахче.

Времето на Жозе Мурињо во Турција и натаму е тема на насловните страници во оваа земја. Според извештаите на неколку локални медиуми, Фенербахче потрошил околу 36,5 милиони турски лири, приближно 750.000 евра, за да го покрие луксузниот престој на португалскиот тренер во хотелот „Фор Сизонс“ во Истанбул, каде живееше повеќе од една година.

Тренерот кој во 2024 година седна на клупата на Фенербахче со цел да го врати во врвот на европскиот фудбал, престојувал во „најексклузивниот апартман“ на хотелот, со поглед на Босфорот и сите можни удобности.

Сумата што сега ја откри турската печат предизвика бура внатре во клубот, особено по ненадејното заминување на Мурињо во август 2025 година, кога Фенербахче го раскина договорот со него по елиминацијата од Бенфика во квалификациите за Лигата на шампионите.

Во текот на 15-те месеци поминати во Истанбул, Мурињо беше во центарот на вниманието поради конфликтите со управата, острите изјави, а сега и поради цената на неговиот престој.

Сметката за хотел дополнително се надоврзува на отштетата од 12 до 15 милиони евра, што наводно му ја исплатил турскиот клуб по отказот.

Како и обично, португалскиот стратег не го коментираше случајот, иако многумина во Турција оваа информација ја гледаат како доказ за огромните трошоци во неговата ера во Фенербахче. Вкупно, неговиот престој го чинеше клубот речиси колку и годишната плата на еден од неговите најплатени фудбалери.

Само неколку недели по заминувањето од Турција, Бенфика официјално објави дека Мурињо е назначен за тренер до 2027 година, што го означи неговото долгоочекувано враќање во португалскиот фудбал. Сепак, резултатите засега не ги исполнуваат очекувањата.