Модриќ ќе изненади со трансфер после сезоната и ќе остане во Европа?

Ситуацијата околу Лука Модриќ е тема која ја анализираат многу спортски медиуми. Капитенот на хрватската репрезентација и капитен на Реал Мадрид е под договор со мадридскиот гигант до крајот на Светското клупско првенство (13 јули) и засега не е познато дали клубот ќе му го продолжи договорот за уште една сезона. Модриќ е во Реал од 2012 година и е најтрофејниот играч во историјата на клубот (28), но наскоро ќе наполни 40 години и најдобрите фудбалски години се веќе зад него. Желба му е да остане во Реал.

Иако е на позни фудбалски години, Модриќ сè уште е силен адут на Реал. Тоа го докажа и на неодамнешниот натпревар против Мајорка кога беше еден од најдобрите на теренот. Sofascore ја оцени неговата игра со оценка 8.6. Само еднаш оваа сезона доби повисока, пред три месеци против Џирона.

Сè помалку шанси за останок?

“Изгледа дека тоа не е доволно за да ги промени трендовите поврзани со неговата иднина во соблекувалната на Сантиаго Бернабеу. Барањата за обновување на клучните позиции како одбраната и средината на теренот во првиот тим значат дека Лука Модриќ има сè помалку шанси да остане во белиот дрес”, наведува Defensa Central во текстот каде што се истакнува каде би можел Модриќ да ја продолжи кариерата ако Реал не му го продолжи договорот.

“Дискусијата за неговата иднина сè уште е присутна на листата на задачи на раководството на клубот. Во исто време, можните понуди за ангажирање на Лука Модриќ сè повеќе се натрупуваат, како што истакнува Ману Карењо. Новинарот од Cadena SER открива неочекувана дестинација во случајот дека средниот играч реши да се пресели од главниот град на Шпанија ова лето”, продолжува текстот.

Одлуката е на новиот тренер

Со истакнување дека одлуката е на следниот тренер на Реал, кој би требало да биде поранешниот соиграч на Модриќ, Чаби Алонсо, се додава дека “капитенот на Реал Мадрид не сака да замине ниту во Арапските Емирати, ниту во Соединетите Држави”, туку би сакал “да продолжи да се натпреварува во Европа, можеби во некој италијански клуб”.

“Голема цел на овој сѐ уште играч на Реал по завршувањето на Европското првенство во Германија минатото лето отсекогаш била ‘да игра на Светското првенство’ во 2026 година, ‘и потоа да ја заврши кариерата’ на крајот од тоа меѓународно натпреварување. Поради тоа, Лука Модриќ би сакал да го продолжи својот престој во европскиот фудбал во Серија А, што би му олеснило повик од Златко Далиќ за тој турнир”, заклучува текстот.