Милан ја објави последната очекувана разделба, двајца играчи се враќаат во клубот

Милан ја објави разделбата со десниот бек Алесандро Флоренци, кој си заминува како слободен играч по истекот на неговиот договор.

Така, клубот се поздрави со сите играчи од кои се очекуваше да заминат, откако во претходните два дена „росонерите“ потврдија за разделбата со позајмените Жоао Феликс, Рикардо Сотил, Кајл Вокер, Тами Ејбрахам и Лука Јовиќ, чии договори не беа обновени.

34-годишниот Флоренци помина четири сезони во Милан, а во првата сезона играше како позајмен од Рома, по што беше купен за околу 3 милиони евра.

Поранешниот италијански репрезентативец беше дел од шампионската екипа на миланскиот гигант во сезоната 2021/22, при што во целиот свој период на „Џузепе Меаца“, во кој често беше мачен од повреди, забележа вкупно 77 натпревари со 3 голови и 7 асистенции.

Меѓувремено, беше потврдено дека во Милан се враќаат двајца играчи од средниот ред, кои го поминаа сезоната на позајмица во други клубови, но нивните опции за купување не беа активирани. Едниот е Јасин Адли, кој забележа 35 натпревари со 5 голови и 7 асистенции за Фиорентина, а другиот е Томазо Побега, кој одигра 30 средби со 4 погодоци и 3 асистенции за Болоња.