Фудбалер на Атлетик Билбао доби суспензија поради лек против опаѓање на коса

Одличниот бек на Атлетик Билбао, Јерај Алварез, падна на допинг-тест, а тој тврди дека причина за тоа е лекот кој го користел против опаѓање на коса.

Триесетгодишниот Јерај, кој во 2017 година ја надмина битката со рак на тестиси и беше стандарден играч во одбраната на Атлетик заедно со Дани Вивиан, беше тестиран позитивно по првиот натпревар од полуфиналето на Лига Европа против Манчестер Јунајтед.

Јерај објасни дека е привремено суспендиран и се брани со тоа дека забранетата супстанција се нашла во неговото тело поради лекот против губење на коса кој го користел.

“Откако го победив ракот, со години користам третман против алопеција, а по анализирањето на случајот, беше утврдено дека позитивниот резултат доаѓа од ненамерна употреба на превентивен лек за опаѓање на коса, кој содржи забранета супстанција,” изјави Јерај.

Атлетик Билбао појасни дека суспензијата на Јерај е резултат на “човечка грешка”, но нагласија дека процесот сè уште е во тек и не можат да дадат детални изјави.