Бомба од Англија: Манчестер Сити тргнува по незадоволниот Александер-Арнолд

Манчестер Сити внимателно ја следи ситуацијата околу Трент Александер-Арнолд, чија иднина во Реал Мадрид станува се понеизвесна откако англискиот репрезентативец не успеа да се наметне по неговиот голем трансфер од Ливерпул минатото лето. Иако извори тврдат дека Александер-Арнолд е решен да се избори за своето место, зад сцената наводно се зголемува фрустрацијата од начинот на кој се одвива неговата прва сезона во Шпанија.

Откако пристигна, 27-годишникот започна само пет натпревари во Ла Лига, а шпекулациите околу неговата иднина привлекоа интерес од други клубови, пишува TEAMtalk. Посредници, според извори, веќе воделе разговори со Манчестер Сити, кој пред летниот трансфер рок бара нов десен бек. Иако официјален пристап уште нема, Сити внимателно ја проценува ситуацијата.

Александер-Арнолд минатото лето потпиша петгодишен договор со Реал Мадрид кој трае до 2029 година. Поради тоа, секој трансфер би барал значајна отштета. Мадрид не е под притисок да го продаде, но незадоволството на играчот може да отвори врата за преговори ако пристигне вистинска понуда.

Летните планови на Манчестер Сити

Новимот спортски директор на Сити, Уго Виана, веќе покажа дека не се плаши од големи потези по јануарските аквизации на Марк Геи и Антоан Семењо, што најавува храбар пристап и во следниот трансфер период.

Првакот се подготвува за динамично лето, имајќи предвид дека иднината на неколку истакнати имиња – вклучувајќи го Родри, Џон Стоунс и Бернардо Силва – е неизвесна. Ова би можело да ги забрза плановите за обнова на клучните делови од тимот, а позицијата на десен бек е високо на листата на приоритети.

Само неколку клубови можат да си ја дозволат аквизацијата на Александер-Арнолд од Мадрид, а Ман Сити е сигурно меѓу нив. Неговото доаѓање би било значајно засилување, имајќи го предвид фактот дека за време на играњето за ривалскиот Ливерпул беше сметан за еден од најдобрите бекови во Европа, каде што освои осум големи трофеи.

Во 354 натпревари за “Црвените” запиша 23 гола и 92 асистенции. Бидејќи во Мадрид нема исто влијание, враќањето во Премиер лигата би можело да го привлече.