Бивш возач на Формула 1 уапсен во меѓународна акција

Поранешниот возач на Формула 1 Адриан Зутил е уапсен во рамките на меѓународна акција поради сомневање за измама и проневера. Како што известува германскиот весник Билд, а пренесува Дејли Меил, 42-годишниот Германец, кој во кариерата возел за тимовите Spajker, Форс Индија и Заубер, е приведен под тешки обвиненија.

Зутил, кој сè уште не се огласил јавно за обвиненијата, се натпреваруваше во Формула 1 од 2007 до 2014 година. Иако никогаш не се најде на пиедесталот, оствари респектабилна кариера, а најдобрите резултати му беа четвртото место на Големата награда на Италија во 2009 и петтите места во Малезија 2010 и Монако 2013 година. Сепак, го држи и неславниот рекорд по број на стартови (128) без ниту еден пласман на победничкиот пиедестал.

Јавноста го познава и по инцидентот од 2011 година, кога во еден ноќен клуб во Шангај со чаша шампањ го повредил Ерик Лукс, тогашниот извршен директор на тимот Лотус. Во клубот таа вечер бил и Луис Хамилтон, тогашен најдобар пријател на Зутил, но не учествувал во конфликтот.

Поради тој инцидент, Зутил во 2012 година беше прогласен за виновен за нанесување тешки телесни повреди и беше осуден на условна казна од 18 месеци и парична казна. Но, настанот означи и крај на неговото пријателство со Хамилтон, кој беше повикан како сведок, но одби да сведочи во корист на Зутил.