Барселона доби лоши вести за Олмо, Лапорта има уште една шанса да го „спаси“

Нови лоши вести пристигнаа денес во Барселона. Жалбата на каталонскиот клуб за регистрација на Дани Олмо и Пау Виктор беше одбиена.

Вистинска катастрофа ја снајде Барселона затоа што Дани Олмо не може да игра за каталонскиот гигант бидејќи денес беше одбиена жалбата на клубот за неговата регистрација.

Барселона има уште само една опција. Тоа е продажба на ВИП влезници за следните 20 години по намалена цена, за на тој начин да се соберат средства за регистрација на Олмо и Пау Виктор.

Ла Лига треба да го одобри овој потег до утре. Ако тоа се случи, Барса ќе има можност за регистрација, а ако дојде одбивање, Каталонците се во огромен проблем.

Одбивањето од страна на Ла Лига би значело и веројатно заминување на Олмо од тимот по само неколку месеци. Тоа би била вистинската катастрофа.

Шпанскиот фудбалер е платен 55 милиони евра, настапи во 15 натпревари со учинок од шест гола и една асистенција. Се очекуваше неговата експлозија во наредните месеци, но сега би можело да се случи повеќе да не игра.

Каталонскиот „Спорт“ тврди дека Барса би можела сепак да се извлече од оваа непријатна ситуација и дека регистрациите би можеле да се комплетираат.

„Извори многу блиски до преговорите потврдија дека со продажба на ВИП влезници Барса треба да заработи повеќе од 200 милиони евра. Тоа би овозможило регистрација на Дани Олмо и Пау Виктор“, се наведува во текстот.