Арбелоа мака мачи во Реал, но не се откажува: Подготвен е да повика и играчи од младинскиот тим

Фудбалерите на Реал Мадрид во петок патуваат во Виго на пресметка со Селта, а Алваро Арбелоа се соочува со бројни кадровски проблеми.

Како што стана јасно оваа недела, Родриго ги повреди лигаментите на коленото, најлоша можна повреда која ќе го држи надвор од терените меѓу 10 и 12 месеци. Од претходно, повредени се Џуд Белингем, Килијан Мбапе и Дани Себаљос, а на нивната листа сега се придружува и Давид Алаба. Дин Хаусен, Алваро Карерас и Франко Мастантуоно се под суспензија.

“Алаба нема да биде подготвен, но Асенсио би можел да се врати. Ако и тој не успее, имаме на располагање млади играчи како Диего Агвадо и Ламини Фати од вториот тим, во кои имам голема доверба. Нашиот тим од младинската категорoja е полн со играчи на исто годиште со Мастантуоно и Хаусен, веќе со години играа за Кастиља. Се сеќавам кога го донесовме Винисиус како млад играч и му верувавме, и покрај сите приказни околу него, сега гледате каде е. Ние мора да имаме трпение. Реал Мадрид е најголемиот клуб на светот и не е за секого, затоа мора да ги заштитиме и поддржуваме нашите млади таленти кои знаат што значи Реал Мадрид,” изјави Арбелоа.

Тој не се откажува од борбата за титулата.

“Барселона е пред нас со четири, а не осумнаесет поени. Сè додека сме математички во игра, ќе се бориме за титулата. Сепак, на играчите им реков да не гледаат на табелата, туку да се концентрираат на Селта, која е најважниот натпревар за нас во моментов. И јас не размислувам за ниту еден друг противник,” нагласи Арбелоа.

Натпреварот меѓу Селта и Реал Мадрид е закажан за петок во 21:00 часот, а потоа следи првиот дуел со Манчестер Сити, во среда во истиот термин.