Лосон јасен пред одлуката на Рејсинг Булс: Сега ми е важна само една работа

Лијам Лосон игра најдобра сезона досега во Формула 1, но неговото место во Рејсинг Булс и натаму не е гарантирано.

Новозеланѓанецот досега освои бодови на 12 од 17 трки, а влезе во поени и на три спринт-настани. Најдобриот негов резултат сезонава е петтото место, кое го повтори во Монако и на спринтот во Сингапур.

Сепак, според најавите, токму неговото место може да биде загрозено доколку Ред Бул реши да му даде шанса во тркачко седиште на Никола Цолов, кој е во трка за титулата во Формула 2. Во исто време, Арвид Линдблад се очекува да добие и втора сезона по впечатливата дебитантска година.

Доколку Лосон остане без место на гридот во 2027 година, во тој момент не би имало слободни опции во Формула 1. Сепак, пазарот на возачи би можел да биде поотворен за 2028 година.

Возачот порача дека во моментов не сака да ја троши енергијата на тоа што ќе се случува следната сезона.

„Не знам дали треба да правам нешто посебно, но за мене лично, како и за сите возачи, целта е да победуваме“.

Лосон нагласува дека приоритет му е да се најде во средина што ќе му даде шанса да се бори за врвот.

„Мојот фокус е да се ставам во позиција да можам да победувам. Ако можам да одам во тим што ми дава подобра можност за тоа, тогаш тоа е јасно она што сите го сакаме“.

Тој додаде дека не размислува премногу за тоа како Ред Бул ќе ја донесе одлуката.

„Кога станува збор за спецификите околу Ред Бул, тие и претходно покажале дека не секогаш ги носат одлуките токму од тие причини. Не знам што ќе се случи следната година, но искрено, тоа не е нешто на што сега мислам многу“.

„Отсекогаш се зборувало за такви работи и нормално е да се обидуваш да ги покриеш сите опции. Но во овој момент, тоа навистина не ми е главна тема“.

Наместо тоа, Лосон е насочен кон продолжението на сезоната, која ја оценува како многу добра во првиот дел.

„Имав навистина добар прв дел од годината. Искрено, имав и неколку добри трки во Ред Бул, а сега ни следуваат патеки што треба да ни одговараат. Сè уште сме сериозно во битка за петтото место кај конструкторите и тоа е она на што сум фокусиран“.