Јабуселе откри зошто го избрал Панатинаикос: Сакав да играм кај најдобриот тренер во Евролигата

Ѕвездата на Панатинаикос, Гершон Јабуселе, во разговор за емисијата Pick n’ Roll на Magenta TV објасни што пресудило да го избере грчкиот гигант.

Францускиот висок кошаркар истакна дека сакал да биде дел од амбициозен тим и да работи со, како што рече, најдобриот тренер во Евролигата.

„Сакав да играм кај најдобриот тренер во Евролигата и покрај некои од најдобрите играчи. Сакав да дојдам во врвен тим кој сака да биде на самиот врв“, изјави Јабуселе.

Тој направи и интересна паралела меѓу Панатинаикос и Бостон Селтикс, клуб каде исто така настапуваше во кариерата. Според него, сличноста не е само во боите, туку и во културата и традицијата.

„Тешко е директно да се споредуваат, но поради културата, боите и ирското наследство на Бостон, би рекол Селтикс и Панатинаикос. Сепак, Европа и НБА се различни“, додаде тој.

Јабуселе се осврна и на својот необичен кошаркарски пат, признавајќи дека не очекувал кариерата да му се развива во таа насока. Во текот на патувањето играл во Кина, како и во Филаделфија, Њујорк и Чикаго.

„Никогаш не замислував дека кариерата ќе ми заврши вака. Играв во Кина, во Филаделфија, Чикаго и Њујорк. Се трудам да останам цврсто на земја. Додека моето семејство е добро, и јас сум добро“, рече кошаркарот на Панатинаикос.

Тој нагласи дека настапите во различни сали и пред различни навивачки бази оставиле силен впечаток кај него, особено поддршката што ја добивал и во потешките моменти.

„Тоа беше неверојатно искуство: различни тимови, различни навивачи. Прекрасно беше да се игра во Медисон Сквер Гарден. Посебно чувство е и да се оди во ТД Гарден. Играњето во Филаделфија исто така беше неверојатно. Дури и кога губевме, навивачите ни покажуваа љубов. Последната станица ми беше Чикаго, поинаква организација, но навивачите секогаш беа тука“, изјави Јабуселе.

Во интервјуто се допрел и до идејата за НБА Европа. Според него, таков проект би можел да донесе поголема видливост и подобри финансиски можности, не само за играчите, туку и за целиот стручен и медицински персонал.

„Лично мислам дека тоа може да биде добра работа. НБА е најголемиот пазар во спортскиот свет, па зошто таа видливост да не се искористи за раст, особено за играчите? Ако тоа значи повеќе пари за кошаркарите, тренерите, помошниците и медицинскиот тим, тогаш зошто да не?“, порача Јабуселе.

На крајот, тој јасно посочи дека би сакал НБА и Евролигата да соработуваат, а како пример за град што би имал корист од таква експанзија го издвои Лондон.

„Ако таква видливост може да се донесе во еден од најдобрите европски градови како Лондон, тоа би било одлично. Се надевам дека сè ќе помине добро, но би сакал Евролигата и НБА да работат заедно. Тоа би било многу добро за кошарката во Европа“, истакна Јабуселе.