Жабуселе за НБА Европа: Ако донесе повеќе пари и развој, зошто да не?

Гершон Жабуселе отворено зборуваше за новото поглавје во кариерата и за тоа како го доживува Панатинаикос, клуб во кој препознал дел од атмосферата што ја памети од Бостон Селтикс.

Во разговор за емисијата „Pick n’ Roll“ на Magenta TV, францускиот репрезентативец објасни дека врската меѓу двата клуба за него не е само во препознатливата зелена боја, туку и во традицијата, културата и амбицијата што ги носат со себе.

Жабуселе истакна дека сакал да биде дел од тим со највисоки цели и да игра во средина што се бори за најголемите трофеи. Токму тоа било една од причините да ја продолжи кариерата во Атина, каде што, според неговите зборови, видел проект на врвно ниво.

Говорејќи за споредбата меѓу европската и американската кошарка, тој порача дека не е лесно директно да се изедначуваат клубовите од двете страни на Атлантикот, но ако треба да посочи сличен пример, тогаш Панатинаикос и Бостон се клубовите што најмногу му доаѓаат на ум.

„Тешко е да се направи споредба, но би рекол Селтикс и Панатинаикос, поради културата, боите и ирското наследство на Бостон. Сепак, Европа и НБА имаат свои разлики“, истакнал Жабуселе.

Тој се осврна и на својот необичен кошаркарски пат, признавајќи дека не очекувал кариерата да го одведе во толку различни средини. Пред враќањето во европската кошарка, настапуваше во Кина, а беше дел и од неколку НБА франшизи, меѓу кои Филаделфија, Њујорк, Чикаго и Бостон.

Според него, секоја од тие станици оставила посебен впечаток, а особено ги памети арените и навивачите кои му давале поддршка и во моменти кога резултатите не биле најдобри.

Посебно внимание привлече и неговиот став за можниот проект НБА Европа. Жабуселе смета дека влегувањето на НБА брендот на европскиот пазар може да донесе поголема видливост за кошарката, нови инвестиции и подобри услови за сите што работат во спортот.

„Лично мислам дека тоа би можело да биде добро. НБА е најголемиот пазар во спортот, па зошто да не ја искористиме таа видливост за да напредуваме, особено ние играчите? Ако тоа значи повеќе пари за играчите, тренерите, помошниците и медицинскиот персонал, зошто да не?“, порача францускиот кошаркар.

Тој како една од можните придобивки ја посочи и поголемата промоција на европските градови на глобално ниво. Притоа, го издвои Лондон како град со сериозен потенцијал да биде важен дел од таков проект.

Сепак, Жабуселе јасно нагласи дека не би сакал евентуалниот развој на новото натпреварување да оди на штета на Евролигата. Неговата желба е НБА и Евролигата да најдат заеднички интерес и да работат заедно, бидејќи тоа, според него, би било најдобро решение за иднината на кошарката во Европа.

„Ако може да донесе таква видливост за градови како Лондон, еден од најдобрите градови во Европа, тоа би било одлично. Се надевам дека сè ќе помине добро, но сакам Евролигата и НБА да работат заедно. Тоа би било многу добро за кошарката во Европа“, додаде Жабуселе.