Хамилтон без двоумење: Не ги сакам асфалтните излетни зони во Формула 1

Луис Хамилтон јасно порача што мисли за еден сè почест детал на современите Формула 1 патеки – асфалтните излетни зони покрај свиоците.

Возачот на Ферари, кој дебитираше во шампионатот уште во 2007 година, призна дека повеќе му одговарал постариот пристап, кога околу патеките имало помалку вакви површини, а повеќе трева и чакал.

За време на викендот за Големата награда на Сингапур, Хамилтон беше прашан дали трките порано биле физички потешки, но во одговорот се осврна и на тоа како со текот на времето се сменил дизајнот на патеките.

„Имаше многу промени низ годините, како сите овие излетни зони, кои лично не ми се допаѓаат“, изјави Хамилтон.

Тој додаде дека му недостига периодот кога имало помалку простор за грешка надвор од патеката, но истовремено потенцираше дека денешната Формула 1 функционира поинаку.

Во изминатите години, голем дел од патеките што влегоа во календарот се насочија кон асфалтни излетни зони наместо традиционалните тревни и чакалести делови. Како пример се наведува Остин, односно патеката „Сиркјуит оф Америкас“, која е дел од календарот од 2012 година.

Хамилтон таму заврши во чакал во 2024 година, но дури откако претходно го загуби болидот со голема брзина во 19. свиок и се лизна преку широк асфалтен дел. До моментот кога стигна до чакалот, веќе беше далеку од самата патека.

Причината за ваквиот тренд е јасна: кога возачот ќе излета пошироко, со асфалт има поголеми шанси да се врати без оштетување, додека тревата и чакалот можат веднаш да ја уништат трката.

Покрај тоа, постои и практичен аспект. Патеки како онаа во Остин се користат за повеќе различни шампионати, а прилагодувањето на границите на патеката за секоја серија посебно бара дополнително време и трошоци.

Кога станува збор за физичката тежина, Хамилтон издвои два периода како најнапорни во неговата кариера.

„Првата година, нормално, затоа што ми беше прва сезона во Ф1 и беше брутално телото да се навикне“, рече Британецот.

Тој посочи и на сезоната 2020 како особено тешка.

„И 2020 беше тешка. Тогаш болидот беше најбрз и имаше најмногу потисна сила, па тоа беше и физички најголемиот предизвик“, додаде Хамилтон.