Тензијата околу Тајлер Дорси и натаму е тема во Олимпијакос, а сега за целата ситуација проговори и Еван Фурние.
Во гостување во емисијата „Pick n’ Roll“ на Magenta TV, Французинот се осврна на реакцијата на Дорси на социјалните мрежи, на ривалството меѓу Олимпијакос и Панатинаикос, но и на можноста НБА да се прошири во Европа.
Фурние смета дека европската кошарка има потреба од подобар финансиски модел, но истовремено стравува дека со евентуално влегување на НБА би можело да се изгуби дел од препознатливата атмосфера.
„Мислам дека на Европа ѝ треба подобар бизнис-модел. Во исто време, атмосферата е неверојатна. Ако дојде НБА, сигурно ќе сака да промени некои работи. А ако го изгубите тоа, ќе ја изгубите и лудоста што ја прави европската кошарка посебна. Од деловен аспект, веројатно ќе гледаат што најмногу функционира со тимови од атрактивни градови како Лондон, Манчестер и Рим. Лично, не сум многу убеден во тоа.“
Посебно внимание привлече неговиот став за објавите на Дорси додека Олимпијакос бил во Шпанија. Фурние призна дека бил затекнат и порача дека такви прашања не треба да се решаваат јавно.
„Да, тоа беше изненадување. Претходно ништо не беше кажано. Вакви работи да се изнесуваат на социјални мрежи дефинитивно не е добра идеја. Тоа треба да се среди приватно. Сигурен сум дека и тој го знаел тоа. Верувам и дека се кае. Сепак, не знам што ќе се случува понатаму. Тимот мора да продолжи напред и да ја зачува поврзаноста. Не смееме да дозволиме ништо да нè оттурне од тој пат.“
Фурние зборуваше и за жестокото ривалство со Панатинаикос, признавајќи дека денес е помал оптимист отколку во својата прва сезона во Грција кога станува збор за можен мир меѓу двата табора.
„Искрено, не мислам дека тоа е можно. Во првата година верував дека може да се случи, но потоа видов дека многу работи не се здрави. Играчите и навивачите најчесто го следат раководството. Кога раководството покажува дека сака војна, сите други тргнуваат по тој пат. Одлично е што Грција има вакви ривалства, но понекогаш се преминува границата.“
Тој додаде дека конфликтите на социјалните мрежи му штетат на производот, а како пример го посочи и Суперкупот со Олимпијакос, Панатинаикос, ПАОК и АЕК, каде што на трибините немало публика.
„Кавгите на социјалните мрежи му штетат на производот. Мене многу ме разочара што на Суперкупот немаше навивачи на трибините. Некој мора да го направи првиот чекор. Не велам дека треба да се сакаат, но барем треба да можат да се толерираат.“
Учество во игри на среќа е дозволено за лица со 18+ години. Играј одговорно!