Тијана Бошковиќ откри за кого навива кога играат Звезда и Партизан

Тијана Бошковиќ ја отвори сезоната со трофеј, откако нејзиниот Вакифбанк славеше против Езачибаши со 3:2 во турскиот Суперкуп. По натпреварот, една од најдобрите одбојкарки во светот зборуваше пред медиумите не само за успехот на тимот, туку и за едно интересно прашање поврзано со кошарката.

Бошковиќ беше прашана дали во европските натпреварувања повеќе навива за Црвена звезда или за Партизан. Нејзиниот одговор беше јасен – симпатиите ги има кон двата српски клуба.

„Сакам да гледам кошарка, особено Евролига. Секако, навивам за српските клубови, Партизан и Црвена звезда. Секогаш кога играат во Истанбул, ако имам можност, се трудам да одам на натпревар, да ги гледам и да им дадам поддршка“, изјави Бошковиќ.

Освен за кошарката и белградските ривали, српската ѕвезда зборуваше и за значењето на трофејот со кој Вакифбанк ја започна новата кампања. Таа истакна дека ваков старт носи дополнителна енергија и мотивација за продолжението на сезоната.

„Одлично е чувството да ја почнеш сезоната со освоен трофеј. Тоа ни носи голема возбуда и дополнителен мотив да продолжиме да работиме и да играме уште подобро. Оваа година имаме шанса да освоиме уште четири трофеи и среќни сме поради тоа. Знаеме дека нема да биде лесно, затоа што имаме многу квалитетни ривали и во домашното првенство и во Европа. Единствено што можеме е секој ден да го даваме максимумот, да работиме напорно и да се надеваме на добри резултати на крајот од сезоната“, порача Бошковиќ.

Иако зад себе веќе има статус на една од најдоминантните одбојкарки на денешницата, таа нагласи дека не обрнува многу внимание на пофалбите и признанијата. Наместо тоа, фокусот го држи на личниот напредок и на тоа секојпат да го даде својот максимум кога е на теренот.

„Се трудам да не размислувам премногу за тоа. Само сакам да го дадам максимумот секогаш кога ќе добијам шанса. Знам дека секој може да напредува, па така и јас морам да продолжам да се усовршувам. Размислувам само за тоа како секој ден да бидам подобра“, додаде таа.

Бошковиќ посебно го истакна и тимскиот дух во Вакифбанк, нагласувајќи дека успехот не е приказна за една одбојкарка, туку за целата екипа. Во тој контекст зборуваше и за капитенката Зехра, која, како што потенцираше, има огромно значење за составот.

„Не би зборувала само за Зехра, туку за сите соиграчки. Навистина сум среќна што сум тука. Ова ми е втора последователна сезона и прекрасно е да се дели теренот со толку одлични играчки и луѓе. Зехра е наш капитен и својата улога ја извршува на најдобар можен начин. Таа многу ни помага, а на претходниот натпревар видовте како одигра. Беше прогласена за најкорисна играчка на мечот и нејзиното искуство и квалитет значат многу за тимот“, заклучи Бошковиќ.

Со трофеј во рацете и со јасно поставени амбиции, Вакифбанк ја почна сезоната на идеален начин, а Бошковиќ уште еднаш покажа дека покрај индивидуалниот квалитет, во преден план секогаш го става колективот.

Коментари