Бутсен ВДС ја освои пол-позицијата во Портимао, историски момент за новото Порше

Бутсен ВДС ќе стартува од пол-позицијата на финалната трка од GT World Challenge Europe Endurance Cup во Портимао, откако Морис Шуринг, Доријан Боколаќи и Алесио Пикариело имаа најдобар просек во квалификациите.

Автомобилот #2 Porsche 911 GT3 R оствари просечно време од 1:42.071 низ трите квалификациски сегменти и беше за 0.108 секунди побрз од #17 GetSpeed Mercedes-AMG, зад чиј волан беа Ралф Арон, Максимилијан Гец и Фабијан Шилер.

Шуринг и Боколаќи беа најбрзи во првите два сегмента, а Пикариело ја доврши работата во Q3 и му ја донесе на тимот пол-позицијата и бонус бодот. Воедно, ова е прв пол во Endurance Cup за Порше од спецификацијата 992.2.

Трето место на стартот му припадна на #80 Lionspeed GP Porsche, додека веднаш зад него е #64 HRT Ford. Од петтата позиција ќе тргне #50 AF Corse Ferrari, кој го делат Артур Леклер, Алберт Коста и Лилу Ваду. Шестопласиран е #48 Mercedes-AMG Team MANN-FILTER, болидот на шампионите во Endurance Cup.

Најбрз единечен круг во целата сесија возеше Симон Бирч со време 1:41.652, со што на #71 Selected Car Racing Ferrari му обезбеди пол во Gold Cup и осмо место во генералниот пласман.

Во Silver Cup, пол-позицијата ја освои #30 WRT BMW на Амаури Кордел, Матис Лисмонт и Игнасио Монтенегро, кој ќе стартува од 15-тото место. Во Bronze Cup, Роберт де Хан беше најуспешен со #991 Paradine Competition BMW и ќе тргне како 22-ри. Секоја пол-позиција по класа носи по еден шампионатски бод.

Валентино Роси, пак, го чека тешка задача во трката. Неговиот #46 WRT BMW, што го дели со Макс Хесе и Нил Ферхаген, ќе стартува дури од 59-тото место, откако екипажот не запиша валидно време во Q2.

#3 Mercedes-AMG Team Verstappen Racing, автомобилот на Макс Верстапен, ќе ја почне трката од 14-тата позиција.

Трката во траење од три часа започнува во сабота во 17:00 часот по локално време.