Откриени детали: Чикаго нуделе сè што имаат за да го добијат Дончиќ

Неверојатна блокбастер размена со која Лука Дончиќ на почетокот на февруари премина во Лос Анџелес Лејкерс, а Ентони Дејвис замина во Далас Маверикс, е главната приказна оваа сезона во НБА лигата. Во рамките на размената со Дончиќ во Лејкерс заминаа и Макси Клебер и Маркиф Морис, додека во Далас отидоа Макс Кристи и избор од првиот круг на драфтот во 2029 година. Во размената беше вклучен и Јута Џез, кој доби Џален Худ-Шифино од Лејкерс и два избора од вториот круг на овогодинешниот драфт.

Сите се прашуваа како еден од најдобрите кошаркари во лигата, во своите најдобри години (25), беше разменет за 31-годишник и само еден идниен избор на драфтот. Далас го направи токму тоа. Лејкерс го добија Дончиќ, а во замена го земаа Ентони Дејвис, врвниот центар, но озлогласен по повредите кои ја одбележаа неговата кариера.

Работата ја завршија мошне тајно и експресно генералните менаџери: Нико Харисон од Далас, кој се ослободи од словенечкиот играч и Роб Пелинка од Лејкерс. Колку биле дискретни сведочи и фактот што за преговорите не знаел ниту Леброн Џејмс, ниту ѕвездите вклучени во размената.

Сега е откриено дека Лејкерс не биле единствените што испратиле понуда за Дончиќ. Џо Коули, новинарот на Чикаго Сан-Тајмс, пишува: „Извор од клубот ни откри дека Артурас Карнишовас, извршниот потпретседател на Чикаго Булс, му понуди на Далас било кој играч од тимот, доколку Далас ги известат дека Дончиќ е достапен во февруари.”

Подоцна се дозна дека Чикаго им нуделе на Далас сè што имаат и биле дури подготвени да ја вложат иднината на франшизата за нов проект околу Словенецот.

Фото: Grok AI