Славниот Едгар Давидс заработи црвен картон на дебито за новиот клуб

Поранешниот холандски играч за врска Едгар Давидс неславно ја започна епизодата на клупата во португалскиот третолигаш Олханенсе.

Давидс после долго време се врати на тренерската работа. Тој ја прифати понудата на Олханенсе, а вчера неговиот тим одигра 0:0 против Лустијано Еворе.

На дебито нервозниот Давидс заработи исклучување. Му приговараше на судијата после неколку стартови, а тој му покажа црвен картон. После натпреварот Давидс одби да даде било каква изјава за медиумите па објаснување за оваа негова постапка изостана.

Ќе потсетиме Давидс е вистинска легенда во европскиот фудбал, во неговата богата кариера играше за: Ајакс, Милан, Јувентус, Барселона, Интер, Тотенхем, Кристал Палас и Барнет.

Токму во Барнет го имаше првото тренерско искуство и го водеше овој тим од 2012 до 2014 година.