Меси ја доби на маса последната понуда, се чека одговор!

Попладнево Хорхе Меси го посети домот на својот син Лионел Меси во Барселона, за да го информира за развитокот на преговорите со раководсвото на клубот.

Хорхе помина еден час во домот на Лео и како што пренесува „Гол“ го советувал да ја прифати последната понуда на Барселона за да остане во клубот уште една сезона.

Утрово таткото на Меси проведе втор разговор со претедателот Бартомеу, откако вчерашната средба не даде резултат.

Клубот му нуди договор до 2022 година, со тоа што следната година до 10 јуни Меси ќе може да ја искористи клаузулата и да замине без обештетување.

Таква клаузула Меси има и во актуелниот договор и сака да ја активира, но од клубот се категирични дека таа истекла во јуни и не сакаат да го пуштат без пари.

Според последните информации Меси најверојатно ќе ја прифати понудата да остане уште една сезона во Барса, а конечната одлука треба да ја донесе до крајот на неделата.