Манчестер јунајтед на „Енфилд“ може да постави два негативни рекорда

Манчестер Јунајтед повторно се наоѓа во тешка криза, доаѓањето на новиот менаџер Рубен Аморим наместо Ерик тен Хаг среде сезона не промени ништо, тимот е само 14 во Премиер лигата со седум бодови повеќе од зоната на исфрлање, а што е уште полошо, денеска го очекува гостување кај неприкосновениот лидер Ливерпул, во најголемото дерби на Англија.

Имаше добри моменти, како победата над Манчестер Сити (2:1), но „црвените ѓаволи“ потоа влегоа во „црна“ серија.

Аморим изгуби пет од осум натпревари во Премиер лигата, а на последните три остана без бод и гол, и тоа во дуелите со Борнмут (0:3) и Њукасл дома (0:2), односно со Вулверхемптон на гости (0:2).

„Можете да видите по моето лице како се чувствувам, споредете какво беше кога дојдов. Тешко е кога не играте добро“, рече португалскиот стручњак.

Ако изгуби од Ливерпул, тоа ќе биде првпат Јунајтед да доживее четири врзани порази во лигата од февруари 1979 година.

А ако изгуби и повторно не постигне гол, тоа ќе биде првпат да доживее четири врзани порази со „нула“ од април 1909 година.

„Играчите се анксиозни, понекогаш и исплашени на теренот. Мораме да се справиме со тоа“, нагласи Аморим.

Дуелот на „Енфилд“ почнува во 17.30 часот.