Ѓоковиќ преку Хачанов до полуфиналето во Астана

Српскиот тенисер Новак Ѓоковиќ се пласираше во полуфиналето на АТП турнирот од серијата 500 во Астана, откако во четврт-финалето го совлада Русинот Карен Хачанов со 2:0. Во сетови беше 6:4 и 6:3. Дуелот траеше еден час и 29 минути.

Новак фуриозно го отвори мечот против 18. тенисер во светот. Веднаш направи брејк во вториот гем, беше сигурен на своите сервиси и веднаш поведе со 3:0. Сепак, Хачанов се врати, го одзеде сервисот на Ѓоковиќ во петтиот гем, а потоа израмни на 3:3.

Потоа беше целосно изедначено, се до десеттиот гем, кога Србинот повторно притисна на сервис на Хачанов и стигна до сет топката, која ја реализираше со одличен форхенд винер, за 6:4.

Новак продолжи со добра игра, а веќе во вториот гем од вториот сет доби нова брејк топка, но не успеа да ја искористи. Она што не го направи во вториот гем беше во четвртиот гем, кога прво одигра перфектно враќање на брејк-точката, а потоа и одличен бекхенд за 3:1.

Тоа беше почеток на крајот за Русинот. Ѓоковиќ суверено ги спасуваше сервисите, го доби овој дел од играта со 6:3 и ја забележа седмата победа во осмиот меч против Хачанов.

Ривал на Ѓоковиќ во борбата за финалето ќе биде подобар од дуелот меѓу Русинот Данило Медведев и Шпанецот Роберто Баутиста Агут.